Ligjërata virtuale për fuqizimin e të rinjve

Në kuadër të Programit të Mentorimit, Rrjeti CSR Kosova zhvilloi një seri ligjëratash virtuale për të rinjtë përfitues të programeve zhvillimore të Unicef Kosovo Programme, në bashkëpunim të ngushtë me partnerët IPKO Foundation dhe YMCA in Kosovo.

Tematika e parë u fokusua në qëndrueshmërinë afatgjate të projekteve dhe matjen e impaktit, dy elemente thelbësore për implementim të suksesshëm. Ligjërata u drejtua nga Rina Fetahaj nga Sustainability Leadership Kosova, e cila ndau ekspertizën e saj rreth rëndësisë së projekteve të qëndrueshme dhe identifikimit e vlerësimit të ndikimit të tyre.

Në vijim, Zana Bajrami Rama, Menaxhere për Marrëdhënie me Publikun dhe Komunikim në KOSTT dhe Anëtare e Bordit në Rrjetin CSR Kosova, trajtoi rëndësinë e komunikimit efektiv si faktor kyç për suksesin e projekteve. Ajo ofroi udhëzime praktike për ndërtimin e marrëdhënieve dhe përçimin e mesazheve me ndikim në komunitet.

Ligjërata mbi menaxhimin e suksesshëm të projekteve u udhëhoq nga Visar A. Jasiqi, Zyrtar Kryesor për Zhvillim në RIT Kosovo, i cili pajisi pjesëmarrësit me aftësi praktike dhe qasje menaxheriale për realizimin e projekteve të tyre.

Për të adresuar stresin e shkaktuar nga pandemia, Floriana Bajrami mbajti një sesion mbi meditimin e ndërgjegjësimit dhe teknikat e frymëmarrjes, duke theksuar ndikimin pozitiv të këtyre praktikave në mirëqenien psikologjike.

Programi i Mentorimit është pjesë kyçe e projektit “Kosovo Generation Unlimited”, i cili implementohet nga Rrjeti CSR Kosova dhe përkrahet nga Unicef Kosovo Programme, Austrian Development Agency dhe SIDA.