Mentorimi si investim në zhvillimin e të rinjve

Qëllimi kryesor i mentorimit të të rinjve është zhvillimi i tyre profesional dhe personal. Përmes projektit “Skema e Mentorimit”, Rrjeti CSR Kosova synon të rrisë kapacitetet e të rinjve për t’u përfshirë në tregun e punës, në procese vendimmarrëse dhe në çështje me interes publik.

Mentorimi është një marrëdhënie e ndërtuar mbi besim dhe respekt reciprok, nga e cila përfitojnë jo vetëm të rinjtë, por edhe vetë mentorët. Përmes këtij angazhimi, mentorët kanë raportuar përmirësim të aftësive vetëvlerësuese, rritje të ndjeshmërisë sociale, thellim të njohurive kulturore dhe forcim të përgjegjësisë ndaj sfidave me karakter shoqëror.

Rrjeti CSR Kosova, me përkrahjen e UNICEF Kosovo Programme, vazhdon të mobilizojë ekspertizën e sektorit privat, shoqatave të bursistëve dhe përfaqësuesve të shoqërisë civile për të mbështetur fuqizimin profesional të të rinjve dhe përfshirjen e tyre aktive në shoqëri.